تلفزتنا
إعْلامْ …. إعْ
كل شي فينا يبيعْ
التلفزة هزها الريحْ
ودْويزمْ
بارْكا غ علْ الشطيح ْ
دار لبريهي هيا هيا
وسوميشة تفسر ليا
كيف نْطيب قْنية
يا دلالي ويا دلالي
تلفزتنا عامرة غ بالبالي
ها أفلام دالاس
ها برامج لْفَلاس
ها أسبوع لْفرس
ها مشاريع ْ
! وشي ف الشارعْ
ها روح المقاولة
!وحنا عندنا لْبطالة
ها مختفون
مزيان …
وفينا هما لمختفون لخْراينْ ؟
لي كلو وشرْبو
! وْضرْبو الصْنيدْقات وهرْبو
كال ليك :
«عْفى الله »
وكل شي دْخل لجْواه
علاش نحاسبوهم يا إخوان ؟
« ياك حنا جيران »
ها جار ومجرور
ها مهند ونور
! وحنا بقينا اللور
هذا برنامج مائدة
الله يخليها قاعدة
النشرات والجريدة
لا أخبار جديدة
ركن اللفتي إذا إذا
سئل ف لْعقيدة
لا معنى لا فائدة
سؤال من زْحليكة
إمرأة زلَكَتْ في لْحَمام
هل ينوي زوجها الحج عنها ؟
نقول لهذا السائل
الذي سأل هذا السؤال
الله يرحم ركن اللفتي
ديال لْحَثيث
شَدْ لانتريت
وْجانا ركن اللفتي
ديال لانترنيت
www.islam couma
سؤال من دكالة
PC أشْنو لْفَرْق بين لفارة ل
؟WC ولْفارة ل
الشاعر الزجال ميراني الناجي
